Seanca plenare në Kuvendin e Shqipërisë ka nisur mes tensioneve politike, ndërsa një detaj i pazakontë është vënë re në sallë. Pranë tavolinës ku qëndron kreu i grupit parlamentar të Partisë Socialiste, Taulant Balla, është vendosur një efektiv i Gardës së Republikës.

Kjo masë mbrojtëse vjen pas përplasjes fizike që ndodhi disa ditë më parë në Kuvend mes Ballës dhe deputetëve të Partisë Demokratike, Gazment Bardhi dhe Klevis Balliu. Incidenti ndodhi pas deklaratave të Ballës për deputeten Albana Vokshi, kur ai u shpreh: “për ty kemi numrin 0900”.

Pas këtij episodi, Bardhi dhe Balliu u përjashtuan me 10 ditë nga punimet e Kuvendit nga Komisioni i Etikës.

Vendosja e gardistit pranë tavolinës së Ballës ka shkaktuar reagime nga opozita. Deputeti demokrat Flamur Noka i është drejtuar kryetarit të Kuvendit gjatë seancës për të kërkuar shpjegime se përse është marrë një masë e tillë sigurie.

Ndërkohë, përmes një reagimi në rrjetet sociale, Noka e ka kritikuar ashpër këtë vendim.
“E padëgjuar më parë që deputetit t’i vendoset truprojë personale në sallën e Kuvendit! Frikacaku 0900 me tel në dorë ka thyer rekordin e përshtirësisë”, shkruan ai në Facebook.