Pas ndërprerjes masive të energjisë elektrike që ka prekur disa rajone të Spanjës, Portugalisë dhe Francës jugore, energjia ka filluar të rikthehet në disa nga zonat e goditura. Hetimet fillestare të Agjencisë së Bashkimit Evropian për Sigurinë e Informacionit (ENISA) sugjerojnë se ndërprerja ka pasur një shkak teknik dhe nuk ka lidhje me ndonjë sulm kibernetik.

“Deri më tani, hetimet tregojnë se problemi është teknik, ndoshta i lidhur me kabllot e energjisë. Megjithatë, situata po monitorohet nga afër dhe jemi në kontakt të vazhdueshëm me autoritetet kombëtare dhe ato të BE-së për të siguruar informacionin më të fundit,” deklaroi ENISA.

Ndërkohë, kryeministri portugez Luis Montenegro theksoi se nuk ka asnjë indikacion që të ketë ndodhur një sulm kibernetik. Ai e quajti ndërprerjen e energjisë si një problem teknik dhe siguroi qytetarët se situata është nën kontroll.

Për momentin, energjia po rikthehet ngadalë dhe autoritetet vazhdojnë hetimet për të zbuluar shkakun e plotë të ndërprerjes.