Reperi i njohur shqiptar, Feronit Shabani, i njohur me emrin artistik Fero, ka shpërndarë një mesazh emocional në rrjetet sociale, duke treguar dhimbjen që ndien për ndarjen nga vajza e tij, Nina.

Në një postim të publikuar në InstaStory, ai shkruan:

“Gati një vit pa të parë. Ndoshta ke harruar se kush është babai yt, ose ndoshta po të mungoj. Mendoj shumë për ty, na kanë bërë padrejtësi”, duke e shoqëruar mesazhin me hashtagun #shtetikorruptuar.

Fero ka folur shpesh për marrëdhënien e vështirë me ish-bashkëshorten e tij, modelen Arbenita Ismajli, duke e akuzuar se ka shkelur marrëveshjen për kujdestarinë prindërore.

Reperi, i cili kohët e fundit është rikthyer në muzikë, ka theksuar se ka kaluar muaj të tërë pa pasur kontakt me të bijën, ndërsa ka shprehur publikisht shqetësimin për atë që e quan “padrejtësi institucionale”.

Çështja e kujdestarisë mbetet ende e paqartë në sytë e publikut, ndërsa ndjekësit vijojnë të ndjekin zhvillimet në këtë histori të ndjeshme mes një babai dhe vajzës së tij.