Protestat masive në Serbi si një rebelim kulturor dhe jo politik – Studentët, faktor kyç në përballjen me regjimin

Në një artikull të publikuar në Index.hr me titullin “Vuçiç ka frikë për herë të parë”, gazetari kroat Vedran Salvia analizon situatën e trazuar në Serbi, ku protestat masive kanë sfiduar pushtetin e presidentit Aleksandar Vuçiç.

Sipas Salvia-s, protesta e fundit kundër qeverisë është cilësuar si më e madhja në historinë moderne të Serbisë, me mbi 100,000 pjesëmarrës, madje më shumë se në protestat që çuan në rrëzimin e Sllobodan Millosheviçit.

Gazetari thekson se, megjithëse Vuçiç nuk do të rrëzohet nga pushteti, këto protesta do të kenë një efekt të thellë në çmitizimin e figurës së tij si lider absolut. “Vuçiç sillet si president, kryeministër dhe çdo ministër njëkohësisht. Këto protesta janë një shok për të dhe për ata që mendonin se ai ishte i pamposhtur,” thotë Salvia.

Roli i studentëve dhe rebelimi kulturor

Një aspekt thelbësor i protestave është mungesa e një lideri të qartë dhe mospërfshirja e drejtpërdrejtë e opozitës. Sipas Salvia-s, studentët janë të vetëdijshëm për rrezikun e kapjes së protestës nga opozita tradicionale dhe kanë refuzuar ndërhyrjen e saj. “Ata nuk kanë liderë, por kjo i bën më të fuqishëm. Ky është një rebelim kulturor dhe jo politik, gjë që e bën Vuçiçin të paaftë për të reaguar,” vijon ai.

Sipas analizës së Salvia-s, ky është një moment i vështirë për Vuçiç, pasi ai përballet me një lëvizje që nuk mund të kontrollohet përmes mekanizmave tradicionalë të pushtetit. Megjithatë, gazetari vlerëson se, edhe pse protesta nuk do të përmbysë menjëherë regjimin, do të lërë pasoja të thella në imazhin dhe legjitimitetin e Vuçiçit.

Kjo situatë shihet si një pikë kthese në Serbi, ku zemërimi qytetar ka tejkaluar kufijtë politikë dhe është shndërruar në një manifestim të pakënaqësisë shoqërore dhe kulturore.