Kreu i Grupit Parlamentar të Partisë Demokratike, Gazment Bardhi, gjatë një replike me kreun e grupit socialist Taulant Balla në Kuvend, theksoi se PD distancohet qartë nga dhuna, korrupsioni dhe lidhjet e politikës me krimin e organizuar.

Bardhi përsëriti gjithashtu kërkesën e Komisionerit të Jashtëm Evropian që Partia Socialiste të distancohet publikisht nga rastet e korrupsionit, duke përmendur konkretisht deputeten Belinda Balluku dhe nevojën për heqjen e imunitetit të saj për të përballuar drejtësinë si çdo qytetare tjetër.

“Ne distancohemi nga dhuna, nga politikanët e lidhur me krimin e organizuar, nga çdo krim. Të injorosh një fjalim të Komisionerit të Jashtëm që kërkon që kjo mazhorancë të distancohet nga korrupsioni i Ballukut, nuk është e pranueshme,” tha Bardhi.

Ai shtoi se qytetarët duhet të jenë të informuar për pasuritë publike dhe vendimet e qeverisë, duke kritikuar menaxhimin e pronës publike që u kalua një fondacioni francez, për të cilën u deshën protestat e 28 shkurtit që të bëhej e njohur.

“Shqipëria nuk vuan nga simbolikat, por nga thelbi i kësaj qeverisjeje: korrupsioni dhe krimi i organizuar. Distancimi nga krimi dhe korrupsioni duhet të jetë i menjëhershëm, sipas asaj që kërkon Komisioneri i Jashtëm,” përfundoi Bardhi.