Kreu i grupit parlamentar të PD-së, Gazment Bardhi, ka kërkuar nga foltorja e Kuvendit hetimin e institucioneve që japin kredi, duke theksuar se pasojat e këtyre kredive po i vuajnë qytetarët shqiptarë. Bardhi i referua rastit të Pal Trashaj, i cili dy ditë më parë u helmua në dyert e SPAK, pas një përballjeje me pasojat e një kredie.

“Dua të ndalem tek rasti i Pal Trashaj. Nuk mund të heshtim kur ka me mijëra qytetarë që po vuajnë abuzimet nga kompani të miratuara nga Banka e Shqipërisë. Përgjegjësinë kryesore e ka Banka e Shqipërisë dhe me emër e mbiemër guvernatori i bankës. Ka përshtatur rregullat e bankës së Shqipërisë sipas interesave të kompanisë. Guvernatori i Bankës së Shqipërise ka përgjegjësi ligjore. Po ne e dimë që ti marrësh shtëpinë dhe pasurinë një familje shqiptare, është njësoj si ti marrësh jetën. Ata kanë punuar për të pasur një shtëpi dhe e gjen veten nga 700 mijë lekë kredi në 7 milionë lekë. Kjo nuk është çështje që duhet të na ndaj ne kemi pjekurinë për ti shërbyer këtyre qytetarëve duke evidentuar përgjegjësit e guvernatorit dhe arsyet që e kanë cuar atë që të mos veprojë në kohë, si i ka licensuar këto kompani dhe kur ka vepruar që ti heq licensën. Për këto guvernatori i Bankës do të duhet që të jap llogari në Kuvend. Duhet të hetojmë nëse interesat e kompanive të lidhura me Guvernatorin e Shqipërisë e kane nxitur atë të mos ndërmarrë veprime”, tha Bardhi.

Në replikë me Bardhin, deputeti socialist Eduart Shalsi shprehu ngushëllime dhe tha se edhe ai vetë nuk e ka bërë gjumin e qetë që nga ngjarja tragjike e Pal Trashaj.

“Jo vetëm unë, por edhe shumë kolegë këtu në këtë sallë, nuk e bëjmë gjumin e qetë. Unë po e hetoj rastin, po mbledh të gjitha të dhënat e nevojshme, por nuk mund të përdoret kjo ngjarje për të sulmuar institucionet e pavarura”, tha Shalsi.