Kreu i Grupit Parlamentar të PD, Gazment Bardhi, ka reaguar pas lirimit të Sali Berishës nga arresti shtëpiak. Bardhi e përshëndeti vendimin e Gjykatës së Posaçme Kundër Korrupsionit dhe Krimit të Organizuar (GJKKO), duke e cilësuar atë si një veprim të duhur ligjor dhe të harmonizuar me frymën dhe logjikën e vendimit të Gjykatës Kushtetuese disa ditë më parë.

Sipas Bardhit, ky vendim përfaqëson një fitore politike të Berishës dhe një shembull të qëndresës së tij në përballjen me atë që ai e quan një “regjim të Edi Ramës”.

Reagimi i Bardhit:

“Revokimi nga GJKKO i masave kufizuese joproporcionale ndaj Sali Berishës është vendimi i duhur ligjor dhe nën frymën, standardin dhe logjikën e vendimit të disa ditëve më parë të Gjykatës Kushtetuese. Çdo ditë vonese do të ishte një sulm politik i drejtësisë ndaj kundërshtarëve të regjimit të Edi Ramës, me qëllim pengimin e aktivitetit politik të tyre në funksionalitet të plotë të betejës së opozitës.

Afërsisht një vit pengesë antikushtetuese e aktivitetit politik të liderit të opozitës është mjaftueshmërisht e rëndë për të toleruar të bëheshin më shumë! Kjo është një fitore politike e Sali Berishës që luftoi, luftoi, luftoi dhe e fitoi!”