Një ngjarje e rëndë ka ndodhur ditën e djeshme në Malësinë e Madhe ku babai dhe dy fëmijët duke udhëtuar me mjetin e tyre kanë rënë në vendin e quajtur “Grykë Lugje”. Rrjedha e ujit të përroit i mori përpara dhe si pasojë prej makinës u bë dalja e vajzës e cila u morr nga banorët e zonës, ndërsa në ujë mbeti babai me të birin të cilët për fat të keq humbën jetën tragjikisht.
Ditën e sotme, pas 16 orësh kërkime intensive pa pushim që nga momenti kur ndodhi ngjarja, polumbarët e RENEA-s në bashkëpunim me forcat e tjera të shpëtimit gjetën dhe nxorën nga uji trupat e babait dhe të birit të mbytur.
Njoftimi i policisë:
Malësi e Madhe, Shkodër/Informacion shtesë
Në vijim të informacion të dhënë mesditën e djeshme se në vendin e quajtur “Grykë Lugje”, në njësinë administrative Shkrel, Malësi e Madhe, rrjedha e ujit të përroit kishte marrë përpara një automjet me të cilin udhëtonin tre persona, banorë të zonës. (babai, djali dhe vajza), ju bëjmë me dije se:
Pas 16 orë kërkimesh intensive, gjatë pasdites së djeshme, gjatë natës dhe gjatë mëngjesit të sotëm, nga polumbarët e RENEA-s, grupi i evakuim-shpëtimit, grupi alpin i FNSH Shkodër, emergjencat civile dhe shërbimet e Komisariatit të Policisë Malësi e Madhe, në gjatësinë e përroit, në Bogë, u bë e mundur gjetja e dy trupave (babë e bir).
