Një trup i pajetë është zbuluar pasditen e sotme në tokat bujqësore pranë spitalit “Memorial” në Fier. Sipas burimeve policore, viktima është një mashkull rreth 55 vjeç, i cili u gjet nga kalimtarë të rastit.

Pas njoftimit, policia ka mbërritur në vendngjarje dhe ka kryer ekzaminimet e para. Nga të dhënat paraprake, dyshohet se vdekja ka qenë natyrale, pasi në trupin e viktimës nuk janë konstatuar shenja dhune.

Trupi i pajetë është transportuar në morgun e Spitalit të Fierit, ku do të kryhen ekzaminime të mëtejshme për të përcaktuar shkaqet e sakta të vdekjes. Policia vijon punën për identifikimin e viktimës dhe sqarimin e plotë të rrethanave të ngjarjes.