Një person është gjetur i pajetë në orët e para të mëngjesit të sotëm pranë urës së Telit, në njësinë administrative Postribë të Shkodrës. Trupi është pikasur nga kalimtarë të rastësishëm, të cilët kanë njoftuar menjëherë Policinë dhe shërbimet mjekësore.

Menjëherë pas mbërritjes në vendngjarje, efektivët kanë bërë rrethimin e zonës dhe kanë nisur procedurat e para hetimore. Burime paraprake bëjnë me dije se dyshohet që viktima të ketë ndërruar jetë për shkaqe natyrale, megjithatë ende nuk ka një konfirmim zyrtar.

Grupi hetimor po punon për sqarimin e plotë të rrethanave dhe identifikimin e viktimës, ndërsa trupi është transportuar për ekspertizë mjeko–ligjore.

Autoritetet po vijojnë hetimet për zbardhjen e ngjarjes dhe përcaktimin e shkaqeve të sakta të vdekjes.