Gjendja shëndetësore e Papa Françeskut është përkeqësuar për shkak të një infeksioni të rëndë të traktit respirator, duke e detyruar atë të qëndrojë në spital për një kohë të pacaktuar.

Sipas zëdhënësit të Vatikanit, Matteo Bruni, testet e fundit kanë konfirmuar se Ati i Shenjtë po vuan nga një “infeksion polimikrobial i traktit respirator”, një gjendje komplekse që ka kërkuar ndryshime të mëtejshme në terapinë e tij me ilaçe.

Infeksionet polimikrobike janë të shkaktuara nga një kombinim i viruseve, baktereve, kërpudhave dhe parazitëve, duke e bërë trajtimin më të ndërlikuar. Edhe pse nuk është specifikuar sa gjatë do të qëndrojë Papa në spital, Vatikani ka theksuar se “kompleksiteti i simptomave kërkon një qëndrim të përshtatshëm spitalor”.

Ky lajm ka rritur shqetësimet për shëndetin e tij, duke pasur parasysh moshën dhe sfidat e mëparshme shëndetësore me të cilat është përballur Papa Françesku.