Gjergji Nika ka reaguar pas vendimit të Kolegjit Zgjedhor, i cili me vendim unanim 5–0 rrëzoi vendimet e mëparshme të KQZ-së dhe KAS-it, duke i dhënë të drejtën për të garuar si kandidat i pavarur në zgjedhjet e 9 nëntorit 2025 për Bashkinë e Vlorës.

Në një postim në Facebook, Nika e ka cilësuar këtë si një “fitore të drejtësisë mbi presionet politike”, duke theksuar se vendimi është një sinjal i qartë se “askush nuk mund të ndalojë vullnetin e lirë të qytetarëve”.

“Ky vendim vjen pas presioneve të shumta dhe përpjekjeve të hapura nga partitë e mëdha për të penguar një zë të pavarur në garë. Por drejtësia foli qartë: askush nuk mund të ndalojë vullnetin e lirë të qytetarëve,” shkruan Nika.

Ai shtoi se kjo nuk është thjesht një fitore personale, por “një fitore për çdo qytetar që kërkon ndryshim, ndershmëri dhe zë të lirë për Vlorën”.

“Unë hyj në këtë garë me forcën e besimit tuaj dhe me vendosmërinë për ta kthyer politikën te njerëzit, jo te partitë,” përfundon ai.