Një vendim i Bashkisë së Vlorës ka ngritur në alarm banorët e fshatit Tragjas, të cilëve u merret uji i Izvorit për t’u furnizuar disa resorte në Palasë dhe Dhërmi, në pronësi të oligarkëve dhe politikanëve pranë tyre.

Reagimi ka ardhur nga Gjergji Nika, një drejtues aktiv i Partisë Demokratike-Demokratët Euroatlantikë, i cili e cilëson këtë vendim si një shkelje të rëndë ligjore dhe një akt të pastër në shërbim të interesave të një pakice të pasur, në dëm të banorëve të ndershëm që mbështeten tek bujqësia dhe blegtoria për të mbijetuar.

“Është e papranueshme që interesat e shumicës të sakrifikohen për pasurimin e një pakice oligarkësh. Ky vendim do ta varfërojë zonën dhe do të shkatërrojë investimet e banorëve të Tragjasit, të cilët do të mbeten pa një burim jetik uji”, ka deklaruar Nika.

Ai ka denoncuar këtë akt si një shembull tipik të politikës që favorizon oligarkët dhe të ashtuquajturit “investitorë strategjikë” në kurriz të qytetarëve.

“Unë jam me banorët e Tragjasit! Kundër karshillëkut të një pushteti të kalbur, kundër grabitjes së pasurive jetike dhe arrogancës së këtij vendimi të padrejtë. Nuk mund të lejojmë që uji i tyre të shkojë për luksin e oligarkëve, ndërsa ata mbeten pa burime për jetesën e tyre”, ka përfunduar ai.

Postimi i plotë: 

https://www.facebook.com/share/p/18JuubkW19/?mibextid=wwXIfr

Banorët e Tragjasit pritet të reagojnë fuqishëm kundër këtij vendimi, duke kërkuar drejtësi dhe mbrojtje për të drejtat e tyre themelore.