Zyra Federale e Kartelit në Gjermani ka hapur një hetim zyrtar ndaj platformës kineze të tregtisë elektronike “Temu”, me dyshimet se kompania po vendos kushte të padrejta për tregtarët dhe furnizuesit.

Sipas autoritetit gjerman të konkurrencës, “Temu mund të ketë aplikuar praktika të çmimeve që dëmtojnë tregun e lirë dhe për pasojë ndikojnë në rritjen e çmimeve në sektorë të tjerë”.

Hetimi është fokusuar ndaj kompanisë mëmë të Temu, Whaleco Technology Limited, e regjistruar në Dublin të Irlandës – një qendër e njohur për politikat fiskale të favorshme ndaj korporatave.

Platforma kineze ka rreth 19.3 milionë përdorues aktivë vetëm në Gjermani, duke e bërë atë një nga tregjet më të mëdha në Evropë. Megjithëse nuk ka shifra zyrtare për të ardhurat, vlerësimet tregojnë se në vitin 2024 Temu ka gjeneruar 30–70 miliardë dollarë, duke përjetuar një rritje të jashtëzakonshme krahasuar me vitin paraardhës.

Ky hetim vjen pas një procedimi paralel nga Komisioni Evropian, i cili në korrik akuzoi Temu-n për shkelje të ligjeve të BE-së dhe dështim në parandalimin e shitjes së produkteve të paligjshme.

Autoritetet gjermane theksojnë se do të shqyrtojnë me kujdes marrëdhëniet e kompanisë me tregtarët lokalë për të garantuar konkurrencë të ndershme dhe mbrojtje të konsumatorëve.