Ditën e shtunë u finalizua sezoni i katërt i “Big Brother VIP Albania”, me Gjestin, artistin energjik nga Kosova, që u shpall fitues i këtij edicioni. I njohur për energjinë pozitive dhe hiperaktivitetin, Gjesti ka rrëmbyer zemrat e publikut shqiptar, duke siguruar jo vetëm kurorën e BBVA4, por edhe një sukses të menjëhershëm në rrjetet sociale.

Rritja e ndjekësve dhe ndërveprimi me përmbajtjen në rrjet janë ndër treguesit më të qartë të ndikimit të tij. Në profilin e tij në Instagram, videoja e shpalljes fitues ka kaluar shifrën 185 mijë pëlqime, mbi 7800 komente dhe mbi 3900 shpërndarje, duke thyer rekordin e vendosur nga fituesi i edicionit të dytë, Luiz Ejlli, i cili në vitin 2023 kishte grumbulluar 184 mijë pëlqime në të njëjtën video formati.

Luiz Ejlli, ndonëse një figurë që kishte qëndruar larg rrjeteve para BBVA2, u kthye në një fenomen kombëtar pas fitores, duke thyer rekorde të njëpasnjëshme. Megjithatë, Gjesti duket se po e tejkalon edhe këtë standard, të paktën në aspektin e përformancës së hershme në rrjet.

A do të arrijë Gjesti të mbajë këtë famë dhe dashuri nga publiku edhe në të ardhmen, siç bëri Luiz Ejlli? Kjo mbetet për t’u parë. Por një gjë është e sigurt: shifrat flasin vetë dhe Gjesti ka nisur rrugëtimin e tij në post-Big Brother me një impakt të jashtëzakonshëm.