Gjykata e Posaçme Kundër Korrupsionit dhe Krimit të Organizuar ka vendosur masën e sigurisë “arrest në burg” për Durim Bamin, i cili u ekstradua të enjten nga Dubai drejt Shqipërisë.
Sipas raportimeve nga seanca, Bami nuk ishte i pranishëm në sallë dhe u përfaqësua nga avokati i tij, Ilir Murati. Mbrojtja kërkoi zëvendësimin e masës me “arrest në shtëpi”, por trupi gjykues, i kryesuar nga gjyqtari Erion Çela, e rrëzoi kërkesën.
Në seancë, organi i akuzës u përfaqësua nga prokurori i Struktura e Posaçme kundër Korrupsionit dhe Krimit të Organizuar, Altin Dumani. Avokati Murati ngriti gjithashtu shqetësimin se klientit të tij i rrezikohet jeta në burgun 313, duke kërkuar transferimin në një tjetër institucion të vuajtjes së dënimit. Kërkesa pritet të shqyrtohet nga Drejtoria e Burgjeve në bashkëpunim me SPAK-un.
Durim Bami ishte shpallur në kërkim ndërkombëtar, pasi ndaj tij ishte caktuar masa “arrest në burg” për veprat penale: “Sigurimi i kushteve dhe i mjeteve materiale për të kryer vrasje”, “Grupi i strukturuar kriminal”, “Kultivimi i bimëve narkotike” dhe “Kryerja e veprave penale nga organizata kriminale ose grup i strukturuar kriminal”.
Sipas dosjes hetimore, ai akuzohet se ka kërkuar eliminimin e ish-deputetit socialist Arben Ndoka. Në dosje përmenden gjithashtu konflikte me grupe të tjera kriminale, ku pretendohet se edhe ndaj tij kishte plane për atentat.
Në një tjetër episod të përmendur nga SPAK, në shkurt 2021, Bami dyshohet se, së bashku me Endrit Doklen dhe Marklen Hakën, ka planifikuar vrasjen e Tori Xhecukës dhe Erigers Mihasit, ky i fundit i vrarë më pas në Tiranë.
Prokuroria e Posaçme pretendon gjithashtu se Bami ka drejtuar dhe financuar një grup të përfshirë në kultivimin e kanabisit në zonat e Niklës dhe Bubqit gjatë periudhës dhjetor 2019–korrik 2020, si dhe në shtator 2020. Sipas SPAK, në këtë aktivitet dyshohet se është përfshirë edhe ish-efektivi i RENEA-s, Altin Morina, i arrestuar, si dhe persona të tjerë ende të paidentifikuar, të cilët dyshohet se kanë siguruar informacione për të shmangur kontrollet policore.
Hetimet vijojnë, ndërsa Bami do të përballet me procesin gjyqësor për akuzat e ngritura ndaj tij.
