Gjykata e Posaçme kundër Korrupsionit dhe Krimit të Organizuar (GJKKO) ka caktuar datën 13 gusht, ora 10:00, për seancën ku do të shqyrtohet kërkesa e ish-Presidentit Ilir Meta për ndryshimin e masës së sigurisë nga “arrest në burg” në një masë më të lehtë.
Seanca e mëparshme u shty pas kërkesës së avokatit të Metës, Kujtim Cakrani, i cili argumentoi se çështja duhet të shqyrtohet nga gjyqtari që ka ndjekur dosjen në fazën hetimore, Erjon Çela, dhe jo nga gjyqtari i posaçëm Erjon Bani. Për shkak se gjyqtari Çela ishte me pushime, dosja iu caktua Banit si gjyqtar i gatshëm, por ky i fundit shpalli moskompetencë.
Meta kërkon lirimin duke pretenduar se nuk ekziston më rreziku i prishjes së provave, pasi hetimet janë mbyllur dhe dosja ka kaluar për gjykim. Më 4 gusht, SPAK i komunikoi zyrtarisht mbylljen e hetimeve për akuzat: korrupsion, pastrim parash dhe fshehje pasurie, që lidhen me dosjen e lobimit të LSI në SHBA dhe aferën CEZ–DIA.
