Gjykata e Shkallës së Parë e Juridiksionit të Përgjithshëm Korçë ka vendosur sot, më 1 Shtator 2024, të lërë në burg 71-vjeçarin P.L., i akuzuar për abuzim seksual ndaj një vajze të mitur në një kënd lojërash në fshatin Sheqeras të Maliqit.
Në seancën e zhvilluar në orën 11:00, gjykata shqyrtoi kërkesën për vlefshmërinë e arrestimit në flagrancë dhe caktimin e masës së sigurimit ndaj P.L. i cili akuzohet për veprën penale “Marrëdhënie seksuale ose homoseksuale me të mitur” mbetur në tentativë, sipas nenit 100/1 dhe 22 të Kodit Penal. Gjykata vendosi të pranonte kërkesën dhe të vlerësonte si të ligjshëm arrestimin në flagrancë, duke caktuar masën e sigurimit “Arrest në burg”.
Ngjarja e rëndë u denoncua nga babai i vajzës, ndërsa sipas informacionit të marrë, abuzimi është ndodhur në një kënd lojërash pranë shkollës së fshatit. Një banore tjetër e zonës ka parë veprimet e turpshme ndaj vajzës së mitur dhe ka ndërhyrë duke e larguar atë nga vendngjarja.
P.L., i cili është i moshuar dhe jeton i vetëm pasi bashkëshortja dhe fëmijët e tij jetojnë jashtë vendit, është arrestuar dhe ndodhet në qendër të hetimeve për këtë rast të rëndë.
