Gjykata e Lartë ka rrëzuar përfundimisht ankimimin e Arbër Veliajt, vëllait të kryebashkiakut të Tiranës, Erion Veliaj, lidhur me kontrollet e kryera në dhjetor 2024 në banesat dhe ambientet e bizneseve të tij nga SPAK.

Vendimi është marrë në dhomë këshillimi nga gjyqtarët Albana Boksi, Medi Bici dhe Sokol Binaj, të cilët lanë në fuqi vendimin e Apelit të Posaçëm të datës 31 korrik 2025. Ky vendim vulos qëndrimin e mëparshëm të GJKKO, duke dhënë dritën jeshile për vijimin e hetimeve nga institucionet e drejtësisë.

Kontrollet e BKH-së në dhjetor të vitit të kaluar u kryen me urdhër të SPAK dhe vendim gjyqësor të GJKKO-së, si pjesë e hetimeve që Prokuroria e Posaçme po zhvillon ndaj kryebashkiakut Erion Veliaj. Arbër Veliaj kundërshtoi ligjshmërinë e këtyre kontrolleve, por ankimi i tij u rrëzua fillimisht nga Apeli i Posaçëm më 31 korrik 2025.

Me vendimin e sotëm të Gjykatës së Lartë, rrëzimi i ankimit bëhet i formës së prerë. Institucionet e drejtësisë mbeten të autorizuara të vijojnë hetimet në kuadër të çështjes, ndërsa pretendimet e Arbër Veliajt janë hedhur poshtë në të gjitha shkallët e gjyqësorit.