Një gjyqtar në Pensilvani, Angelo Foglietta, ka refuzuar të ndalojë menjëherë shpërndarjen e donacioneve prej 1 milion dollarësh nga miliarderi Elon Musk për votuesit, duke i lejuar atij të vazhdojë këtë aksion deri në zgjedhjet presidenciale të SHBA. Vendimi i gjyqtarit pezullon padinë derisa çështja të shqyrtohet nga një gjykatë federale, një proces që pritet të zgjasë përtej ditës së zgjedhjeve të martën e ardhshme.

Prokurori i Filadelfias, Larry Krasner, kishte kërkuar ndalimin e këtyre donacioneve, duke i cilësuar si një “skemë lotarie të paligjshme për të ndikuar te votuesit.” Sipas tij, Musk dhe komiteti i tij i veprimit politik, America PAC, po përpiqen të ndikojnë në rezultatin e zgjedhjeve përmes ofertës së çeqeve prej 1 milion dollarësh për individë të përzgjedhur rastësisht që firmosin një peticion për mbështetje të lirisë së fjalës dhe të drejtave për armë.

Kjo ofertë e Musk është kufizuar për votuesit e regjistruar në shtatë shtete kyçe, të cilat pritet të luajnë një rol vendimtar në rezultatin e zgjedhjeve: Arizona, Georgia, Michigan, Nevada, Karolina e Veriut, Pensilvania dhe Wisconsin.