Gjykata e Peruxhias ka dhënë dritën jeshile për ekstradimin e Davide Pecorellit në Shqipëri. 49-vjeçari u dënua nga Gjykata e Shkodrës me 4 vite burg muajin e kaluar për një seri akuzash të rënda.

Në tetor 2022, prokuroria e Pukës mbylli hetimet dhe akuzoi italianin për pesë vepra penale: “Mashtrim” në bashkëpunim, “Dhunimi i varreve”, “Veprime që pengojnë zbulimin e së vërtetës”, dhe “Shkatërrimi i pronës me zjarr”.

Ekstradimi i Pecorellit u kërkua nga Prokuroria e Pukës. Ngjarja që tërhoqi vëmendjen filloi kur Davide Pecorelli u zhduk në janar të 2021 në Pukë. Automjeti që ai kishte marrë me qira u gjet i djegur dhe brenda tij u gjetën mbetje skeletore. Autoritetet italiane dhe shqiptare filluan një hetim të gjerë për të mësuar se çfarë kishte ndodhur me biznesmenin.

Në një kthesë dramatike, më 17 shtator 2021, Davide Pecorelli u shfaq i gjallë dhe i shëndoshë në një gomone pranë ishullit Montecristo, duke deklaruar se gjatë këtyre 9 muajve ai kishte qenë në kërkim të një thesari.

Me një intinerar që filloi nga Rinasi drejt Shkodrës dhe më pas në Pukë, Pecorelli humbi gjurmët duke djegur një automjet brenda të cilit kishte vendosur një skelet të marrë nga një varr në varrezat e Pukës. Ky incident shkaktoi një shqetësim të madh mes hetuesve të dy vendeve, të cilët zbarkuan në Pukë për të zbuluar të vërtetën.

Gjatë hetimeve, u zbulua se eshtrat e gjetura në automjetin e djegur nuk përkonin me ADN-në e familjes Pecorelli, duke sjellë edhe më shumë dyshime dhe komplikime në këtë rast të ndërlikuar.