Gjykata e Posaçme ka vendosur të lërë në fuqi masën e “arrest me burg” për shtetasin turk, Yalcin Hanci, i cili akuzohet për pjesëmarrje në një grup të strukturuar kriminal që transportonte emigrantë të paligjshëm, kryesisht në Itali, me skaf. Kjo masë ishte caktuar për Hancin që në vitin 2022, pas akuzave për “Ndihma për kalim të paligjshëm të kufijve”, kryer në kuadër të një grupi të organizuar kriminal.

Yalcin Hanci, i cili u ekstradua nga Gjeorgjia, ishte pjesë e këtij grupi gjatë viteve 2020-2021, i cili trafikonte ilegalisht emigrantë nga Siria, Egjipti dhe Irani drejt Italisë. Gjatë seancës së fundit, trupi gjykues i përbërë nga gjyqtarët Etleva Deda, Ardit Mustafaj dhe Bib Ndreca vendosi të pranonte kërkesën e Prokurorisë së Posaçme dhe të vazhdonte zbatimin e masës së “arrest me burg” ndaj të pandehurit.

Hanci akuzohet për disa vepra penale, përfshirë “Ndihma për kalim të paligjshëm të kufijve”, “Grupi i strukturuar kriminal” dhe “Kryerja e veprave penale nga organizata kriminale”, të cilat parashikohen nga nenet 298, 28, 333/a dhe 334 të Kodit Penal të Shqipërisë.

Prokuroria e Posaçme është urdhëruar të ekzekutojë këtë vendim, ndërsa Hanci ka të drejtë të apelojë vendimin në Gjykatën e Apelit për Korrupsionin dhe Krimin e Organizuar.