Gjykata e Posaçme Kundër Korrupsionit dhe Krimit të Organizuar (GJKKO) vendosi sot zbutjen e masës së sigurisë për Armis Stafën, i cili dyshohet nga SPAK për pastrim parash në kuadër të organizatës kriminale të vëllezërve Hajdar dhe Franc Çopja.

Ky vendim erdhi pas dorëzimit nga avokati i Stafës të të dhënave nga sistemi TIMS, që sipas mbrojtjes, provojnë se gjatë periudhës në të cilën dyshohet se është kryer vepra penale, klienti i tij nuk ndodhej në territorin shqiptar.

Sipas avokatit, Armis Stafa ishte në Itali nga data 19 dhjetor 2019 deri më 30 tetor 2022, ku ishte i bllokuar për shkak të kufizimeve të vendosura për kontrollin e pandemisë COVID-19.

Pas shqyrtimit të këtyre dokumenteve, Gjykata vendosi lirimin e Stafës nga qelia dhe vendosjen e tij në arrest shtëpiak, deri në përfundimin e verifikimeve mbi pretendimet e mbrojtjes.