Gjykata e Posaçme kundër Korrupsionit dhe Krimit të Organizuar ka rrëzuar kërkesat e Sali Berishës dhe dhëndrit të tij, Jamarbër Malltezit, për të hequr masat e sigurisë nën hetim për privatizimin e ish-kompleksit sportiv “Partizani”. Mbrojtja ka ngritur pretendime për vendim të padrejtë, duke akuzuar SPAK-un për sjellje partiake, ndërsa avokati Genc Gjokutaj theksoi se do të ndjekin rrugën ligjore për të arritur në të vërtetën.

“Ne kemi dokumentuar shkeljet skandaloze të këtyre gjykatave. Janë humbur disa beteja, por nuk është humbur lufta. Kur them betejë dhe luftë, aty është dyluftim në gjyq, pavarësisht se SPAK sillet si një parti politike, por do ndjekim rrugën ligjore që është i vetmi mjet i sigurt për të na çuar tek e vërteta. Këta bëjnë sikur nuk kuptojnë por në fund do ta marrin përgjigjen”, tha avokati Genc Gjokutaj.

Ndërkohë, në Gjykatën e Lartë të Drejtësisë, u mbajt seanca e paraqitjes së informacioneve dy mujore të hetimeve të SPAK, ku avokatët kërkuan revokimin e masave të sigurisë. Ndërkaq, Sali Berisha dhe Jamarbër Malltezi vazhdojnë të qëndrojnë në arrest shtëpie, me Berishën që ende mbetet deputet i Kuvendit të Shqipërisë, por riskon humbjen automatike të mandatit nëse nuk shfaqet në seancat plenare deri në fund të qershorit.

Diligjenca dy mujore ishte kopja e dy muajve më parë. Kishte një shtesë që SPAK kishte kërkuar informacion a kishin ndërtesat mbrojtje kundër zjarrit. Janë shumë fashikuj por kuptojmë që është i njëjti tekst”, tha Gjokutaj.