Një grup prej 43 emigrantësh, të cilët u nisën nga porti i Shëngjinit me anijen e patrullës së Rojës Bregdetare italiane, kanë zbarkuar në Bari, pas vendimit të Gjykatës së Romës që kundërshtoi mbajtjen e tyre në kampin e Gjadrit në Shqipëri.

Gjykata vuri në pikëpyetje përfshirjen e Bangladeshit dhe Egjiptit në listën e “vendeve të sigurta” nga autoritetet italiane, duke argumentuar se ekzistojnë interpretime të ndryshme mes së drejtës europiane dhe asaj italiane. Për këtë arsye, çështja i është referuar Gjykatës Europiane të Drejtësisë, e cila pritet të shprehet më 25 shkurt.

Migrantët ishin kapur fundjavën e kaluar në ujërat ndërkombëtare, ndërsa procesi për vlerësimin e mbajtjes së tyre në Gjadër u zhvillua dje përmes videokonferencave. Ky është rasti i tretë që gjykatat italiane kundërshtojnë transferimin e emigrantëve në Shqipëri, në bazë të marrëveshjes mes dy qeverive.

Ndërkohë, përfaqësues të partisë së kryeministres Giorgia Meloni e kanë cilësuar këtë situatë si një “rezistencë të një pjese të gjyqësorit ndaj qeverisë”, ndërsa opozita italiane e ka quajtur “një dështim të madh”.