Gjykata e Tiranës ka dhënë sot (21 janar 2025) vendimin për çështjen e dhunës në familjen mbretërore, ngjarje e ndodhur në mars 2024. Princ Leka Zogu u dënua me 1 vit burg për akuzën “Dhuna në familje”, por për shkak të gjykimit të shkurtuar, dënimi u ul në 8 muaj, ndërsa u vendos pezullimi me 16 muaj shërbim prove.

Po ashtu, gjykata dënoi me 10 muaj burg edhe Gjergj Zaharinë, babain e Elias Zaharisë, por me gjykim të shkurtuar, dënimi u reduktua në 6 muaj e 20 ditë. Në vendimin e saj, gjykata pezulloi dënimin e Zaharisë me 1 vit e 40 ditë shërbim prove.

Ndërkohë, gjyqtarja Migena Laska shpalli të pafajshme Elia Zaharinë, duke argumentuar se fakti nuk përbën vepër penale.

Ngjarja e dhunës brenda familjes mbretërore bëri bujë në mars të vitit të kaluar, kur një video e përplasjes mes palëve u publikua në rrjetet sociale, duke nxitur debat të gjerë në opinionin publik.

Të tre personat u morën si të pandehur për “dhunë në familje”, ndërsa gjykimi ndaj tyre u zhvillua me procedurë të përshpejtuar.