Me pesë vota pro dhe tre kundër, Gjykata Kushtetuese vendosi në favor të Erion Veliajt, duke rrëzuar vendimin e qeverisë për shkarkimin e tij si kryebashkiak i Tiranës dhe dekretin e Presidentit Begaj për shpalljen e zgjedhjeve.

Kundër kërkesës së Veliajt votuan Holta Zaçaj, kryetare e Gjykatës, si edhe Sonila Bejtja dhe Gent Ibrahimi, ndërsa pro vendimit votuan Sandër Beci, Ilir Toska, Fiona Papajorgji, Marsida Xhaferllari dhe Mariana Semini.

Seanca vendimtare u zhvillua më 31 tetor, ku Veliaj kërkoi shfuqizimin e vendimit të Këshillit të Ministrave dhe të dekretit presidencial, duke argumentuar se ato ishin të papajtueshme me Kushtetutën. Seanca, që zgjati rreth shtatë orë, përfundoi me vendimin që i jep fund paqartësisë ligjore dhe politike: Erion Veliaj mbetet kryebashkiaku legjitim i Tiranës.

Vendimi i Gjykatës Kushtetuese pritet të ndikojë direkt në skemën e zgjedhjeve dhe të qartësojë statusin e kryeqytetit, ndërkohë që më parë Kryeministri Edi Rama kishte shpallur si kandidate të PS-së Ogerta Manastirliun.

Ky vendim shënon një fitore ligjore për Veliajn dhe një moment kyç në zhvillimet politike të kryeqytetit, duke vendosur standardin për respektimin e garancive kushtetuese për kryebashkiakun e zgjedhur.