Prokurori i Gjykatës Ndërkombëtare Penale (ICC), Karim Khan ka shprehur shqetësimin e tij për pushtimin rus të Ukrainës duke thënë se gjykata mund të hetojë krimet e mundshme të luftës në vend.

“I kujtoj të gjitha palëve që kryejnë armiqësi në territorin e Ukrainës se zyra ime mund të ushtrojë juridiksionin e saj dhe të hetojë çdo akt gjenocidi, krim kundër njerëzimit ose krim lufte të kryer brenda Ukrainës” tha Khan.

“Është e domosdoshme që të gjitha palët në konflikt të respektojnë detyrimet e tyre sipas ligjit ndërkombëtar humanitar”, tha Khan, duke shtuar se zyra e tij do të vazhdojë të monitorojë nga afër situatën në Ukrainë.

Në dhjetor 2020, zyra e prokurorit njoftoi se kishte arsye të besonte se krimet e luftës dhe krime të tjera ishin kryer gjatë konfliktit në Ukrainën lindore.
Ekzaminimi paraprak u mbyll, por ende nuk është bërë një kërkesë zyrtare për gjyqtarët për hapjen e një hetimi të plotë. Gjyqtarët duhet të bien dakord përpara se të hapet një hetim.