Gjykata e Tiranës ka pezulluar çdo vendim që mund të merrej në Asamblenë e Përgjithshme të Ortakëve të “Vlora International Airport – VIA” sh.p.k., e planifikuar për më 20 tetor 2025, pas pranimit të kërkesës për sigurimin e padisë ndaj kompanisë.

Në vendimin e datës 10 tetor, gjykata ka pezulluar edhe të drejtën e votës për ortakun e shumicës, “Mabco Constructions SA”, kompani në pronësi të biznesmenit Behgjet Pacolli, derisa të regjistrohet kontrata e shitjes së 49% të kuotave që kjo kompani ka transferuar më 3 prill 2025 te “2A Group” sh.p.k.

Gjykata argumenton se mosregjistrimi i kontratës së shitjes përbën shkelje ligjore dhe tentativë për devijim të të drejtave të ortakëve të rinj.

Vendimi vjen pas konfliktit të ashpër mes Pacollit dhe Valdon Ademit, përfaqësues i “2A Group”, me të cilin ai dikur kishte bashkëpunuar në disa projekte. Burime pranë kompanive thonë se shkak i prishjes së marrëdhënies është ndarja e aksioneve në shoqërinë koncesionare të aeroportit të Vlorës.

Zyrtarisht, Mabco e Pacollit zotëron 98% të aksioneve, ndërsa 2A Group vetëm 2%, por Ademi pretendon se ka investuar më shumë se ç’reflektohet në kapitalin zyrtar dhe kërkon një pjesëmarrje më të madhe në pronësi.

Koncesioni i Aeroportit Ndërkombëtar të Vlorës ka një vlerë prej 104 milionë eurosh dhe shtrihet në një sipërfaqe prej 309 hektarësh. Fillimisht, projekti u zhvillua nga një konsorcium mes “Mabetex” (50%), “YDA Group” (48%) dhe “2A Group” (2%), por pas tërheqjes së kompanisë turke në vitin 2021, Mabco Constructions mori kontrollin e plotë të koncesionit, duke blerë aksionet e “YDA Group” për vetëm 4,450 euro — moment që shënoi nisjen e konfliktit mes ortakëve.

Ndërkohë, Prokuroria e Tiranës ka nisur hetime penale për koncesionin e aeroportit, me në fokus Behgjet Pacollin, vëllain e tij Emin Pacolli dhe ish-administratorin Nelson Çela. Hetimi është regjistruar për mashtrim me pasoja të rënda, mashtrim kompjuterik dhe falsifikim dokumentesh, ndërsa burime nga organi i akuzës konfirmojnë se janë sekuestruar disa materiale dhe kontrata financiare që lidhen me projektin.

Në këtë mënyrë, një nga projektet më të mëdha infrastrukturore në vend, që pritej të shënonte “epokën e fluturimeve të jugut”, është tashmë në qendër të një beteje të ashpër ligjore dhe hetimore.