Është zhvilluar gjyqi për grabitjen famëkeqe të Kim Kardashian, ngjarje që ndodhi në tetor të vitit 2016 në Paris dhe që tronditi botën e showbiz-it. Në qendër të seancës gjyqësore ishte Yunice Abbas, 71 vjeç, një nga autorët e dyshuar të grabitjes, i cili për herë të parë shfaqi një formë pendese të vonuar për krimin.

“Këtë herë pendohem për atë që bëra,” deklaroi Abbasi gjatë dëshmisë së tij në sallën e gjyqit, duke shtuar se përkundër kësaj, ai nuk e ndjen veten fajtor për ngjarjen.

Abbasi, i cili ka një të kaluar kriminale të mbushur me akuza për vepra të rënda përfshirë trafik droge, tha para trupës gjykuese se vetëm tani ka arritur të kuptojë traumën që i ka shkaktuar viktimës, në këtë rast yllit të njohur të televizioneve dhe rrjeteve sociale, Kim Kardashian.

Deklaratat e tij janë raportuar nga BBC, ndërsa procesi gjyqësor vazhdon në Paris, me përfshirjen e edhe disa të pandehurve të tjerë. Ngjarja në fjalë ndodhi në një hotel luksoz në Paris, ku Kim Kardashian u grabit nën kërcënimin e armës dhe u mbajt e izoluar, ndërsa autorët u larguan me bizhuteri me vlerë rreth 10 milionë euro.

Gjykata pritet të japë vendimin përfundimtar në javët në vijim.