Pas rrëzimit të kërkesës së Fatmir Mediut dhe avokatëve të tij për përjashtimin e saj nga gjykimi, vetë gjyqtarja Irena Gjoka ka kërkuar largimin nga çështja.

Sipas njoftimit, Gjoka i është drejtuar më 11 nëntor zv/kryetarit të GJKKO-së, Erion Bani, duke shpjeguar se ndodhet në kushte të papajtueshmërisë për të vijuar procesin. Arsyetimi i saj është se ajo ka qenë pjesë e seancës paraprake dhe e ka marrë gjykimin kur i pandehuri kërkoi gjykim të shkurtuar. Më pas, kur Mediut ndryshoi qëndrim dhe pranoi gjykimin me procedurë të zakonshme, Gjoka pretendon se ka interes të kundërt dhe nuk mund të vijojë pjesëmarrjen.

Gjyqtarja ka sqaruar gjithashtu se kërkesa e saj për largim ka marrë shkas edhe nga vetë kërkesa e Mediut për përjashtimin e saj, e cila më parë u rrëzua nga gjyqtarja Etleva Deda.

Pritet që për këtë kërkesë të shprehet drejtuesi i GJKKO-së, Erion Bani, ndërsa seanca e djeshme vijoi me kundërshtimet e Mediut mbi deklarimet e ekspertëve. Procesi gjyqësor ndodhet në fazën e përfundimit të paraqitjes së provave nga SPAK dhe pritet të nisë pyetja e dëshmitarëve të kërkuar nga mbrojtja.