Si rezultat i kontrolleve të vazhdueshme dhe inteligjencës policore, Policia e Vlorës ka goditur një tjetër rast të shitjes së lëndëve narkotike në doza. Dy shtetas, Jazo Shabanaj dhe Eno Hasanaj, janë arrestuar për shitjen e kanabisit në doza, kryesisht në lokale dhe lagje të ndryshme të qytetit të Vlorës.

Në kuadër të operacionit, janë sekuestruar dhjetra doza kanabisi, një shumë parash e dyshuar që lidhet me këtë aktivitet kriminal, si dhe një automjet dhe dy celularë.

Seksioni për Hetimin e Narkotikëve, në bashkëpunim me shërbimet e patrullës së përgjithshme të Komisariatit të Policisë Vlorë, ka zhvilluar veprime hetimore dhe kontrolle të fokusuar në lokalizimin dhe kapjen e personave të përfshirë. Pas kontrolleve të ushtruara mëngjesin e datës 27.01.2025, në lagjen “Uji i Ftohtë”, janë kapur dhe arrestuar J. A., 22 vjeç dhe E. H., 28 vjeç, banues në Vlorë.

Në banesat e tyre dhe gjatë kontrollit fizik, janë gjetur dhe sekuestruar rreth 100 doza kanabisi, një shumë eurosh dhe dy celularë, që dyshohet se janë përdorur për aktivitetin kriminal.

Për këta shtetas, hetimet kanë zbuluar se ata siguronin kanabis dhe e përgatitnin atë në doza për ta shitur kryesisht nëpër lokale dhe lagje të qytetit të Vlorës.

Materialet procedurale janë referuar në Prokurorinë pranë Gjykatës së Shkallës së Parë Vlorë për veprime të mëtejshme, për veprën penale “Prodhimi dhe shitja e narkotikëve”.