Një operacion i përbashkët i Policisë së Lezhës, Departamentit të Policisë Kriminale, Drejtorisë Vendore të Policisë Shkodër dhe Guardia di Finanza italiane, në bashkëpunim me Interpol Tiranën dhe Zyrën e Ekspertit të Sigurisë pranë Ambasadës Italiane në Shqipëri, çoi në goditjen e një rrjeti të trafikut të armëve dhe arrestimin e disa personave.

Në pranga ka rënë 30-vjeçari Françesk Meçaj, i cili ka precedentë të shumtë kriminalë në trafikun e narkotikëve dhe është dënuar dy herë si kreu i një grupi kriminal në qytezën e Lecco-s pranë Milanos në Itali. Ai u kap gjatë një operacioni të zhvilluar në kufirin mes Sllovenisë dhe Italisë, ku u ndalua një mikrobus me armë, i nisur nga Shqipëria dhe drejtuar nga shtetasit E. M. dhe A. D.

Të dy shtetasit janë shoqëruar nga autoritetet italiane për veprime të mëtejshme. Operacioni vijon edhe në Shqipëri dhe Itali për të identifikuar dhe arrestuar pritësit e armëve dhe pjesëtarët e tjerë të grupit kriminal.