Romë, 18 Shkurt 2025 – Një bandë e armatosur ka sulmuar vilën e biznesmenit të njohur italian, Giovan Battista Carosi, pronar i zinxhirit Mondo Convenienza, duke marrë mijëra euro dhe sende me vlerë.

Ngjarja ka ndodhur mbrëmjen e së shtunës në Civitavecchia, pranë Romës, ku gjashtë persona të maskuar dhe të armatosur janë futur në shtëpinë e Carosit. Në momentin e grabitjes, biznesmeni ndodhej në vilë së bashku me kunatin e tij.

Nën kërcënimin e armëve, hajdutët i detyruan të dorëzojnë rreth 50 mijë euro kesh, ndërsa më pas hapën një kasafortë, duke marrë dy orë ‘Rolex’ prej ari, si dhe sende të tjera me vlerë ende të papërcaktuara.

Pasi i mbyllën në një dhomë, grabitësit u larguan pa lënë gjurmë. Policia italiane ka nisur hetimet për të identifikuar autorët dhe për të zbardhur skemën e grabitjes spektakolare.