Granit Plava, i dyshuari për vrasjen e Liridona Murselit, është rrahur fizikisht në burgun e Prishtinës gjatë kohës së shetitjeve të të paraburgosurve. Incidenti ka ndodhur të premten rreth orës 16:00. Të paraburgosur të tjerë kanë kryer aktin e dhunshëm si shenjë hakmarrje për vrasjen e nënës së dy fëmijëve.

Gjatë kësaj ngjarjeje, gardianët kanë ndërhyrë për të ndaluar dhunën dhe për të rikthyer situatën nën kontroll. Pas incidentit, të shtunën, gardianët e burgut kanë gjetur një litar të iprovizuar për varje në dhomën e Granit Plavës. Informacionin e ka konfirmuar Prokuroria Themelore në Prishtinë.

Granit Plava ishte arrestuar dy ditë pas vrasjes së Liridonës, bashkë me Naim Murselin, burrin e së ndjerës, që dyshohet se ka urdhëruar vrasjen. Në të njëjtën kohë, u arrestua edhe nipi i Naimit, Kushtrim Kokalla, i dyshuar për përfshirje në rast.