Greqia ka shpallur një grevë të përgjithshme sot në nderim të 57 viktimave që humbën jetën dy vjet më parë nga tragjedia e përplasjes së trenave në Tempe. Protestat janë shoqëruar me trazira të dhunshme, ku dhjetëra persona janë ndaluar dhe 41 prej tyre janë arrestuar.

Protestuesit kanë hedhur koktejle molotovi në oborrin e Kuvendit, ndërsa disa kanë arritur të kalojnë portën dhe të futen në oborr, ku kanë vënë flakën vendqëndrimit të rojes në Varrin e Ushtarit të Panjohur.

Për të shpërndarë turmën, policia përdori gaz lotsjellës, ndërsa qytetarë të thjeshtë që ndodheshin në sheshin Sintagma janë strehuar në Kuvend për t’u mbrojtur. Tensionet janë ende të larta, dhe forcat e sigurisë vazhdojnë të jenë në gatishmëri për të kontrolluar situatën.