Policia greke ka vënë në pranga 23 persona, pjesëtarë të një rrjeti të organizuar të trafikimit të qenieve njerëzore. Ky grup kriminal transportonte klandestinë nga Shqipëria drejt Greqisë, duke përdorur rrugë tokësore dhe detare. Në anijen e sekuestruar ishte krijuar një kabinë e posaçme për fshehjen e personave të trafikuar.

Në kuadër të operacionit “Kerveros,” forcat e rendit sekuestruan 3,700 pasaporta dhe karta identiteti të falsifikuara, si dhe 50 mijë euro në para cash. Hetimet zbuluan edhe katër laboratorë falsifikimi dokumentesh, ku prodhoheshin kryesisht dokumente shqiptare dhe greke. Në mesin e të arrestuarve është edhe kreu i këtij rrjeti, i cili kishte ngritur laboratorin brenda një apartamenti në Athinë.

Sipas mediave greke, rrjeti kriminal ka përfshirë mbi 500 raste trafikimi, duke përfituar të paktën 4 milionë euro nga aktiviteti i paligjshëm.