Një ngjarje makabre ka tronditur Greqinë Qendrore, ku një 62-vjeçare është arrestuar pasi akuzohet se ka mbajtur të fshehur për tri vite vdekjen e nënës së saj, vetëm që të vazhdonte të përfitonte pensionin dhe pagesat e paaftësisë.

Sipas mediave greke, e dyshuara, drejtoreshë e një Qendre Komunitare në Oinofyta, ka pranuar përpara policisë se nëna e saj 91-vjeçare ndërroi jetë nga shkaqe natyrale në verën e vitit 2023. Në vend që të njoftonte autoritetet, ajo vendosi ta varroste fshehurazi trupin e saj në një stallë pranë shtëpisë, me ndihmën e një të huaji, identiteti i të cilit nuk është zbuluar.

Për më shumë se një vit, 62-vjeçarja mashtronte banorët dhe të afërmit, duke thënë se e moshuara ndodhej në shtëpi. Madje, ditët e fundit ajo paraqiti një tjetër grua të moshuar, duke e prezantuar si nënën e saj, por nën presionin e hetimeve, pranoi të vërtetën e tmerrshme.

Policia, në prani të oficerit gjyqësor, kreu zhvarrosjen dhe gjeti skeletin e mbështjellë me çarçafë, të mbuluar me një shtresë të hollë dheu.

Ngjarja u zbulua falë denoncimeve të komunitetit lokal dhe familjarëve, të cilët kishin vënë re se prej kohësh nuk e kishin parë më 91-vjeçaren.

62-vjeçarja do të dalë para prokurorit të Tebës, ndërsa ndaj saj janë ngritur akuza për mosnjoftim të vdekjes, dëshmi të rreme, mashtrim dhe vrasje nga pakujdesia.