Athinë/Romë – Greqia dhe Italia kanë kërkuar nga Izraeli të garantojë sigurinë e një flote ndërkombëtare me më shumë se 40 anije private, që mbartin ndihma për popullsinë palestineze në Rripin e Gazës.

Në një deklaratë të përbashkët të mërkurën, Ministri i Jashtëm Grek, Giorgos Gerapetritis, dhe homologu italian, Antonio Tajani, bënë thirrje gjithashtu që pjesëmarrësve në flotë t’u sigurohet qasje në mbështetje konsullore.

Dy ministrat iu drejtuan edhe aktivistëve, duke i nxitur ata të pranonin një propozim nga Patriarkana Latine e Jerusalemit, e cila ka ofruar që ndihmat të shpërndahen nga kleri lokal, në emër të flotës, për të shmangur tensione direkte me Izraelin. Aktivistët kishin refuzuar më parë një ofertë të ngjashme të kryeministres italiane, Giorgia Meloni.

Flota, e quajtur Globale Sumud, përbëhet nga dhjetëra anije që synojnë të dërgojnë ndihma humanitare drejt Gazës. Iniciativa të ngjashme në të kaluarën kanë shkaktuar përplasje me Izraelin.

Sipas raportimeve, të mërkurën pasdite flota ishte pozicionuar pranë brigjeve të Egjiptit dhe po lëvizte drejt Gazës së bllokuar.