Pas ditësh të tëra me temperatura përvëluese që tejkaluan 40°C në qershorin e dytë më të nxehtë që nga viti 2010, Greqia po përgatitet për një valë të re të nxehti, e cila do të godasë vendin duke nisur nga fundjava dhe do të intensifikohet gjatë javës që vjen.

Sipas meteorologëve grekë, nga 7 deri më 10 korrik, pritet një rritje e menjëhershme e temperaturave, me termometrin që në shumë zona do të shënojë deri në 43°C, veçanërisht në zonat kontinentale dhe qendrat urbane, ku nxehtësia do të mbetet e lartë edhe gjatë natës.

Masa të shtuara për përballimin e të nxehtit

Autoritetet kanë nisur zbatimin e një plani emergjent, i cili përfshin:
• Qendra publike me ajër të kondicionuar në dispozicion të qytetarëve.
• Kufizim i aktiviteteve në ambiente të hapura për disa profesione si ndërtuesit dhe shpërndarësit nga ora 12:00 deri në 17:00.
• Mbështetje mjekësore dhe këshillim përmes linjave telefonike të dedikuara.

Veçanërisht në zonat turistike si Akropoli, janë marrë masa të veçanta për të mbrojtur shëndetin e vizitorëve nga goditjet e nxehtësisë.

Këshillat e mjekëve

Mjekët u bëjnë thirrje qytetarëve dhe turistëve që:
• Të qëndrojnë të hidratuar dhe të konsumojnë sa më shumë ujë.
• Të shmangin alkoolin dhe aktivitetin fizik gjatë orëve të nxehta.
• Të limitojnë lëvizjet, veçanërisht fëmijët, të moshuarit dhe personat me probleme shëndetësore.
• Të mos hedhin mbeturina gjatë mesditës për të shmangur rrezikun e zjarreve.

Rritje e rrezikut nga zjarret

Meteorologët theksojnë se kjo valë e të nxehtit, si shumë të tjera në vitet e fundit, është një pasojë direkte e ndryshimeve klimatike, duke shtuar rrezikun e zjarreve pyjore, të cilat e kanë goditur rëndë Greqinë në verat e kaluara.

Autoritetet apelojnë për kujdes të shtuar dhe bashkëpunim qytetar gjatë ditëve në vijim, ndërsa monitorimi i situatës do të vijojë në mënyrë intensive.