Grupet kriminale shqiptare, pas Anglisë dhe Uellsit, kanë shtrirë aktivitetet e tyre të rritjes së kanabisit edhe në Skoci, duke ndërtuar fermat e barit nëpër shtëpi dhe magazina. Gazeta skoceze “Daily Record” ka raportuar se tani në çdo qytet të Skocisë ka një prani të grupeve kriminale shqiptare, të cilat janë të përfshira në ngritjen e fermave të kanabisit, përmes të cilave po fitohen miliona stërlina.

Në artikullin e botuar të shtunën, “Daily Record” ka raportuar se kompanitë e shpërndarjes së energjisë elektrike në Skoci janë këshilluar të bashkëpunojnë me policinë për të luftuar shtëpitë e barit, ku vidhet energji për të përdorur llampa të fuqishme për rritjen e kanabisit. Gjithashtu, artikulli përmend disa raste të shqiptarëve që janë kapur dhe dënuar për përfshirje në këtë aktivitet kriminal.

Një prej tyre është Ilir Kasa, i cili u dënuar me 8 vite burg pas filmimeve që e tregonin duke vizituar dy ferma kanabisi në Gllasgow, ku u gjetën 350 dhe 150 rrënjë kanabis. Prodhimi i asgjësuar u vlerësua në 300,000 stërlina.

Në një tjetër rast, Arben Ketuka, i cili kishte marrë me qira një shtëpi për ta kthyer në shtëpi bari, u kap me 200 bimë kanabis, me një vlerë të mundshme prej 172,000 stërlinash. Ai pranoi akuzat dhe pritet të dënohet këtë javë.

Në Dundee, Adiol Hila dhe Indrit Saraci kishin ndërtuar një fermë kanabisi me 3,000 rrënjë, vlera e të cilës ishte 1.7 milion stërlina. Pas pranimit të akuzave, Hila dhe Saraci u dënuan me burgim, respektivisht 3 vjet e 4 muaj dhe 3 vjet e 9 muaj.

Ky fenomen është një tjetër provë e aktivitetit të grupeve kriminale shqiptare që po shtrihen gjithnjë e më shumë në Skoci, duke përdorur metoda të sofistikuara për të kultivuar dhe shpërndarë kanabisin në tregjet e paligjshme.