Grupi i njohur i repit nga Irlanda e Veriut, Kneecap, ka kërkuar falje publike pas reagimeve të forta për një deklaratë shokuese të bërë gjatë një koncerti në nëntor 2023. Gjatë performancës, një anëtar i grupit tha: “I vetmi konservator i mirë është një konservator i vdekur. Vriteni deputetin tuaj lokal.”

Pamjet e këtij incidenti, të cilat u bënë publike së fundmi, kanë ndezur një debat të fortë publik, me hetime nga policia kundër terrorizmit dhe reagime të ashpra nga politikanë të ndryshëm. Deputetja konservatore Kemi Badenoch ka kërkuar që Kneecap të ndiqet penalisht për nxitje të dhunës.

Incidenti ka shkaktuar një indinjatë të thellë, veçanërisht midis familjeve të deputetëve të vrarë në vitet e kaluara, si Jo Cox në 2016 dhe David Amess në 2021. Vajza e David Amess shprehu shqetësim dhe tronditje të thellë për komentet e bëra nga grupi.

Në një deklaratë të publikuar në rrjetin social X, Kneecap tha se nuk kishin pasur qëllim të nxisnin dhunë, duke e përshkruar videon si një fragment të shkëputur nga konteksti dhe të përdorur me dashakeqësi. “Familjeve Amess dhe Cox, u dërgojmë ndjesë të sinqertë, nuk kemi pasur kurrë për qëllim t’ju lëndojmë,” shkruan grupi.

Një zëdhënës i kryeministrit Keir Starmer theksoi se artistët që shprehin pikëpamje të tilla nuk duhet të përfitojnë fonde nga qeveria.

Policia ende nuk ka bërë të ditur nëse do të ndërmerren hapa ligjorë ndaj grupit, ndërkohë që reagimet publike vazhdojnë të jenë të ndara mes kritikave dhe mbështetjeve për lirinë e shprehjes.