Dosja hetimore e SPAK zbulon detaje tronditëse mbi sulmin kibernetik ndaj Prokurorisë së Posaçme, ku ish-drejtori i burgjeve Agim Ismaili dhe dy të tjerë, Arnold Rrokaj dhe Zambak Gjoni, tentuan të aksesonin dhe shpërndanin materiale të ndjeshme të politikanëve nën hetim.

Sipas dokumenteve, Arnold Rrokaj përdori kodin Spak2019 për të hyrë në e-mail-et e disa prokurorëve, ndërsa Zambak Gjoni kërkonte informacion për persona të ndryshëm për t’ia dërguar më pas Ismailit. Në një episod, Zambak i transmetoi Agim Ismailit disa dosje Word me biseda të ish-zv/kryeministrit Arben Ahmetaj, përfshirë edhe kontakte me Mirel Zoton, pronar i kompanive të incineratorëve në Elbasan, Fier e Tiranë.

Një tjetër dokument i dërguar nga Gjoni përmbante titullin “Leter porosi_Austrië”, ndërsa ai e shoqëronte me mesazhin: “Do e haje dhe Damiani me duket”. Po ashtu, Zambak kërkoi informacion edhe për shtetasin Engjëll Agaci, ndërkohë që Rrokaj tentoi të depërtojë edhe tek kompjuteri i Klodian Brahos, atëherë shef i korrupsionit, por pa sukses.

Rrokaj dhe Gjoni u arrestuan vitin e kaluar, ndërsa Agim Ismaili u hetua në gjendje të lirë. Të tre përballen me akuza që përfshijnë pjesëmarrje në grup të strukturuar kriminal dhe ndërhyrje të paligjshme në kompjuterët e prokurorëve të Posaçëm.

Ky rast hedh dritë mbi kapacitetet e krimit të organizuar për të futur dorën në informacionet më të ndjeshme të drejtësisë shqiptare, duke sfiduar sigurinë e hetimeve dhe besimin publik.