Itali / Shqipëri – Hetimet e nisura gjatë periudhës së pandemisë kanë zbuluar veprimtarinë kriminale të katër grupeve të strukturuara, të cilat merreshin me trafik ndërkombëtar droge nga Italia, Spanja dhe Shqipëria.
Autoritetet italiane kanë njoftuar se Guardia di Finanza e Leçes ka përfunduar hetimet paraprake ndaj 29 personave, shtetas italianë dhe shqiptarë, të përfshirë në këtë rrjet kriminal, raporton RaiNews.
Operacioni u zhvillua në disa qytete italiane, duke përfshirë Lecce, Brindisi, Romë, Firence, Pisa, Bolonja, Fermo, Ascoli Piceno dhe Reggio Emilia, si dhe në zona jashtë Italisë.
Gjatë hetimeve, forcat e rendit sekuestruan:
• mbi 2 tonë lëndë narkotike (kokainë, heroinë, hashash dhe marihuanë),
• rreth 5 litra vaj hashashi,
• 192 mijë euro cash,
• dhe 16 automjete të përdorura për transportin e drogës.
Autoritetet italiane po vazhdojnë procedurat ligjore për të dokumentuar dhe ndjekur penalisht të gjithë personat e përfshirë, ndërsa operacioni konsiderohet një goditje e rëndësishme ndaj trafikut ndërkombëtar të drogës në Evropë.
