Fier – Kristjan Marku, i njohur edhe si Kristjan Bardhi, mbeti i vrarë pasditen e sotme në një atentat me armë zjarri në autostradën Fier-Vlorë, pranë zonës së Novoselës. 30-vjeçari, me precedentë të njohur penalë, u qëllua me breshëri plumbash ndërsa udhëtonte me një makinë tip “Volkswagen”. Për pasojë, ai gjeti vdekjen në vend.

E kaluara kriminale dhe përfshirja në konfliktet mes fiseve

Kristjan Marku ishte një personazh i njohur për policinë, me akuza për “Vrasje me dashje në bashkëpunim, e mbetur në tentativë” dhe “Mbajtje pa leje të armëve të zjarrit dhe municioneve luftarake.” Ai ishte përfshirë në përplasjen mes dy fiseve kriminale të njohura, Reçi dhe Bardhaj, një konflikt i ashpër që ka shkaktuar disa viktima vitet e fundit.

Në vitin 2023, Marku, së bashku me xhaxhain e tij, Martin Bardhi (i njohur edhe si Marjan Marku), dyshohet se organizuan një atentat ndaj Sajmir Reçit, nipit të Kastriot Reçit, në qytetin e Rrëshenit. Sajmir Reçi arriti të shpëtonte nga sulmi, ndërsa disa muaj më vonë, Martin Bardhi u vra në një kafene, menjëherë pas lirimit nga burgu.

Zanafilla e përplasjes mes dy fiseve

Përplasjet mes fisit Bardhaj dhe Reçi dyshohet se kanë nisur vite më parë, për një konflikt banal të shkaktuar nga një incident rrugor. Ky konflikt u përshkallëzua në sulme dhe atentate të ndërsjella, duke sjellë viktima nga të dyja palët.

Hetimet vazhdojnë

Policia ka nisur hetimet për identifikimin e autorëve të atentatit, ndërsa ngjarja dyshohet të jetë një tjetër akt hakmarrjeje në zinxhirin e gjatë të përplasjeve mes këtyre grupeve kriminale.

Ky rast është një tjetër pasqyrë e realitetit të rënduar kriminal në vend, ku hakmarrjet dhe përplasjet mes grupeve të strukturuara vijojnë të marrin jetë njerëzish, duke sfiduar shtetin dhe sistemin e drejtësisë.