Policia e Tiranës ka çliruar një hapësirë publike në rrugën “Ali Demi”, e cila prej kohësh ishte zënë në mënyrë të paligjshme nga familja Dosti, përmes blloqeve betoni dhe automjeteve që pengonin hyrjen e banorëve në pallat. Ky zhvillim vjen pas një hetimi të nisur nga Prokuroria e Tiranës mbi një rast të përsëritur të vetëgjyqësisë, falsifikimit të dokumenteve dhe kanosjes.

Në këtë kuadër, më 7 korrik 2025, u arrestua Bujar Dosti, 67 vjeç, ndërsa së fundmi është nisur procedim penal në gjendje të lirë ndaj të birit, Erald Dostit, 25 vjeç. Të dy dyshohet se kanë falsifikuar dokumente që pretendonin pronësinë mbi hapësirën publike, të cilën e kishin zënë në mënyrë të vazhdueshme me mjete të ndryshme, duke shkaktuar përplasje me banorët dhe bllokim të qarkullimit.

Policia sqaroi se për lirimin e hapësirës janë angazhuar strukturat e Forcës së Posaçme “Shqiponja”, specialistët e Hetimit të Krimeve Ekonomiko-Financiare, si dhe shërbimet e Bashkisë Tiranë, të cilat kanë ndërhyrë për të hequr blloqet e betonit. Më herët, nga i njëjti vend janë sekuestruar edhe dy automjete që shërbenin për zënien e paligjshme të territorit.

Gjykata e Tiranës ndërkohë ka caktuar masën e arrestit me burg për 20 ditë ndaj Bujar Dostit, ndërsa materialet e plota të çështjes i janë referuar Prokurorisë për veprime të mëtejshme hetimore.

Policia e Shtetit thekson se do të vijojë operacionet për lirimin e hapësirave publike të zëna në mënyrë të paligjshme, në bashkëpunim me institucionet përkatëse, në funksion të rendit dhe interesit qytetar.