Ish-producenti i njohur i Hollivudit, Harvey Weinstein, ka paraqitur një kërkesë urgjente në gjykatë për t’u transferuar nga burgu i Rikers Island në Qendrën Mjekësore Bellevue, duke pretenduar neglizhencë të rëndë mjekësore që, sipas tij dhe ekipit ligjor, rrezikon seriozisht jetën e tij.
Në dokumentet e siguruara nga TMZ, avokatët e Weinstein pretendojnë “keqmenaxhim të madh” nga ana e stafit mjekësor të burgut, përfshirë diagnoza të gabuara dhe mosofrim të kujdesit të nevojshëm shëndetësor.
Sipas avokatit të tij, Imran Ansari, Weinstein ndodhet në një gjendje shëndetësore jashtëzakonisht të paqëndrueshme, me shtrime të përsëritura në spital dhe madje edhe në njësinë e kujdesit intensiv. Ai po përballet me një listë të gjatë sëmundjesh: kancer, diabet, sëmundje të arterieve koronare, dhimbje gjoksi, apnea e gjumit, probleme të tiroides, obezitet, anemia, hipertension, si dhe dhimbje kronike të shpinës dhe këmbëve.
Ansari e përshkruan situatën në Rikers si një “makth”, ku klienti i tij është i detyruar të jetojë në qeli të ngrira, pa rroba të pastra, dhe ku është infektuar me COVID-19, që më pas i shkaktoi pneumoni të dyfishtë dhe një operacion urgjent për heqjen e lëngjeve nga mushkëritë dhe zemra.
Avokati paralajmëron se nëse keqtrajtimi vazhdon, mund të ketë pasoja fatale, dhe kërkon që Weinstein të qëndrojë në spitalin Bellevue gjatë gjithë procesit gjyqësor të ardhshëm në Nju Jork, për të siguruar stabilitetin shëndetësor.
Ndërkohë, pavarësisht besimit të deklaruar në shërbimin mjekësor të Bellevue, Weinstein ka ngritur një padi prej 5 milionë dollarësh kundër spitalit, qytetit të Nju Jorkut dhe agjencive të tij përkatëse, duke pretenduar vuajtje fizike dhe psikologjike për shkak të kthimit të tij të hershëm në burg pa u rikuperuar plotësisht.
Në një reagim për TMZ, një zëdhënës i Departamentit të Korrigjimeve dhe Autoritetit Shëndetësor të qytetit të Nju Jorkut deklaroi:
“Siguria dhe shëndeti i çdo të burgosuri në burgjet tona do të jetë gjithmonë një përparësi kryesore.”
Procesi gjyqësor i radhës ndaj Harvey Weinstein pritet të zhvillohet në javët e ardhshme.
