Tiranë – Gjykata e Posaçme ka urdhëruar Prokurorinë e Posaçme (SPAK) të nisë hetimet për ish-kryebashkiakun e Tiranës, Erion Veliajn, dhe ish-nënkryetarin Arbjan Mazniku, lidhur me akuzat për “shpërdorim detyre”.

Në një njoftim zyrtar, GJKKO bëri të ditur se ka shpallur të pavlefshme kërkesën e Prokurorisë së Tiranës për pushimin e çështjes penale nr. 1782/2022, që lidhej me veprën penale të “shpërdorimit të detyrës”, me arsyetimin se fakti “nuk përbën vepër penale”.

Trupi gjykues, i kryesuar nga gjyqtarja Rudina Palloj, në vendimin e datës 30 shtator 2025, vendosi që aktet e çështjes të kalojnë për ndjekje në SPAK.

“Kalimin e akteve që ndodhen pranë kësaj gjykate… Prokurorisë së Posaçme Kundër Korrupsionit dhe Krimit të Organizuar,” thuhet në vendim.

Palët kanë të drejtën e ankimit brenda 15 ditësh në Gjykatën e Posaçme të Apelit.

Ky vendim hap një fazë të re hetimore ndaj dy ish-zyrtarëve të lartë të Bashkisë Tiranë, duke rikthyer në vëmendje çështjen e zvarritur prej vitit 2022.