Hetimet e çështjes “Toyota Yaris,” që nisën në Durrës me kapjen e 3.4 milionë eurove të fshehura në makina, kanë marrë një kthesë të re pas materialit të mbërritur në SPAK nga autoritetet belge. Ndërsa fillimisht çështja u transferua për hetime në Prokurorinë e Krimeve të Rënda dhe më vonë në Belgjikë, tashmë del në pah përfshirja e disa personave të tjerë, përveç Drejtuesit të Prokurorisë së Vlorës, Aurel Zarka.

Prokurori belg Julien Moinil ka nisur hetime paralele për të zbuluar fijet e përfshirjes së personave shqiptarë dhe belgë në këtë skemë, që përfshinte transferimin e shumave të mëdha parash nga Belgjika në Shqipëri. Gjatë këtyre hetimeve, është marrë nën hetim avokati Radovan Çela, dhe është marrë në pyetje ish-kreu i PD-së, Lulzim Basha, i cili ishte i pari që denoncoi këtë çështje në parlamentin shqiptar.

Në Belgjikë janë zbuluar deri tani rreth 14 persona të përfshirë në zbutjen e akuzave dhe në mbylljen e çështjeve penale lidhur me tjetërsimin e pronave në Himarë dhe Dhërmi. Këto zbulime kanë çuar në urdhrin e arrestimit të Aurel Zarkës nga SPAK, si dhe shpalljen në kërkim të biznesmenit Astrit Vladi dhe ish-oficeres së Krimeve të Rënda, Eriona Daupaj. Për avokatin Radovan Çela, është vendosur masa e sigurisë “arrest në burg.”

Hetimet nga autoritetet belge kanë zbuluar edhe përfshirjen e kodet e aplikacionit “Sky,” të cilat janë përdorur për komunikim ndërmjet të përfshirëve. Kjo tregon se operacioni për zbulimin dhe ndëshkimin e personave të përfshirë është në vazhdim e sipër, dhe se SPAK ka ende shumë për të bërë në këtë çështje.

Pritet që hetimet të zgjerojnë rrethin e të akuzuarve, duke përfshirë dhe figura të tjera të njohura dhe të rëndësishme, të cilat mund të ndikojnë në përballjen me drejtësinë në lidhje me aktivitetet kriminale dhe korrupsionin e zbuluar.