Menaxherët francezë të lokalit “Le Constellation” në Crans-Montana, ku natën e Vitit të Ri humbën jetën 40 persona dhe u plagosën mbi 100 të tjerë, janë vënë nën hetim nga prokuroria e kantonit Valais.

Ata dyshohen për vrasje nga pakujdesia, shkaktim dëmesh trupore nga pakujdesia dhe zjarrvënie nga pakujdesia, sipas autoriteteve zvicerane.

Ngjarja la të plagosur 119 persona, nga të cilët deri tani janë identifikuar 113, mes tyre 71 zviceranë, 14 francezë dhe 11 italianë. Trupat e parë të identifikuar ishin dy gra zvicerane, 21 dhe 16 vjeçe, dhe dy djem zviceranë, 18 dhe 16 vjeç, të cilët iu dorëzuan familjeve. Mes viktimave ka shumë adoleshentë, pasi lokali ishte i frekuentuar kryesisht nga të rinjtë, në një zonë ku mosha ligjore për konsumimin e alkoolit është 16 vjeç.

Hetimet paraprake tregojnë se shkaku i mundshëm i zjarrit ishte përdorimi i fishekzjarrëve të vegjël gjatë hapjes së shishevave të shampanjës, të cilat dyshohet se janë afruar shumë pranë tavanit të lokalit.

Presidenti zviceran, Guy Parmelin, e ka cilësuar ngjarjen si “një nga tragjeditë më të rënda” që ka përjetuar vendi. Jashtë lokalit janë vendosur lule dhe mesazhe ngushëllimi, ndërsa familjet e viktimave janë duke marrë ndihmë nga Mbrojtja Civile italiane dhe nga ambasadori i Italisë në Zvicër, Gian Lorenzo Cornado. Ai bëri të ditur se procesi i identifikimit të viktimave pritet të përfundojë deri të dielën pasdite, duke u vështirësuar nga djegiet e rënda të trupave.